sigurðurárni.annáll.is

AnnállBænircvGreinarLitlibærMataruppskriftirMyndirPistlarPrédikanirSkírnÚtfararræður

« Hekla Rakel · Heim · Elska og aggiornamento »

Páskabæn

Sigurður Árni Þórðarson @ 15.56 27/3/05

Allt lífið skapar þú. Allt lífið leysir þú. Allt lífið nærir þú. Hér fylgir lofsöngur eða sálarsöngur til Guðs. Bænin var beðin við altarið í Neskirkju í messu á páskadag.

Lífsins Guð

Lof sé þér fyrir dansandi sól;

brosandi jörð; syngjandi öldu við Ægissíðu;

hina dásamlegu sköpun, sem þú hefur reist til lífs.

Fyrir Jesú Krist, Drottinn vorn.

Drottinn heyr vora bæn.

Þú lausnari heimsins

Lof sé þér fyrir að þú veltir steinum við grafhvelfingar.

Þú veltir burt hindrunum á leið okkar til lífsgleði,

til fagnaðar, réttlætis og friðar.

Lof sé þér fyrir að þú sigraðir dauðann og ruddir lífinu braut.

Leyfðu okkur að lifa í því vori og sumri veraldar,

sem þín upprisa ól.

Lof sé fyrir mátt þinn til að reisa við öll þau,

sem eru líflítil og lífvana.

Reis þú, Drottinn, þína veröld.

Þú andi lífs

Hugga þú þau, sem vonlítil eru.

Lækna hin sjúku.

Við nefnum nöfn þeirra í hljóði — .

Vernda þau sem vandastörfum gegna.

Blessa þau sem dæma, stjórna og marka löggjöf.

Farsæl heimilislíf, atvinnu – allt líf samfélags okkar.

Blessa þau, sem útbreiða frið þinn,

boða orð þitt, þjóna að altari þínu,

hlúa að æsku, mennta fólk til lífsleikni.

Gef vitur ráð í þjónustu við þig.

Fyrir Jesú Krist, Drottinn vorn.

Drottinn heyr vora bæn.

Allt lífið skapar þú.

Allt lífið leysir þú.

Allt lífið nærir þú.

Amen

url: http://sigurdurarni.annall.is/2005-03-27/15.56.03/

© sigurðurárni.annáll.is · Færslur · Ummæli