Kjúklingur, núðlur og sveppir
Sigurður Árni Þórðarson @ 12.17 23/1/05
Einföld uppskrift, einföld matreiðsla og góð fyrir alla aldurhópa. Létt í maga, góð á bragðið og fáar hitaeiningar. Er þetta ekki ákjósanlegt? Við Litlabæjarfólk mælum með þessum rétti. Góð sunnudagsuppskrift!
Hráefni
2 rauðlaukar
3 cm engiferbútur
4 hvítlauksrif
2 kjúklingabringur, beinlausar og skinnlausar
300 gr sveppir, helst kastaníusveppir
2 msk olía
2 msk sojasósa
2 núðlupakkar með kjúklingabragði
krydd úr núðlupökkunum
1 ½ dl vatn
spínat, hnefafylli
Matreiðsla
Rauðlaukarnir skornir í tvennt og síðan þverskornir í þunnar flögur. Engifer rifinn og hvítlaukurinn smásaxaður. Þetta þrennt steikt í olíu í eina til tvær mínútur og síðan lagt til hliðar.
Kjúklingabringur þverskornar í þunnar sneiðar og sveppirnir skornir líka (ágætt að nota eggjaskera til að skera sveppi!). Bætt við olíu á pönnuna og kjúklingasneiðarnar steiktar báðum megin við háan hita. Kjötmagnið í einu skal ekki vera meira en svo að þið ráðið við að steikja – allt skal vera fallega jafnsteikt báðum megin. Hrærið oft í til að tryggja góða steikingu. Þegar allt kjötið er steikt er sveppunum bætt út yfir kjötið og steikt í viðbót í eina til tvær mínútur.
Síðan er lauknum bætt yfir, sojasósunni, kryddinu úr núðlupokunum og vatninu og soðið við meðalhita í tvær til þrjár mínútur.
Á meðan er sjóðandi heitu vatni hellt yfir núðlurnar og látið standa í þrjár mínútur. Núðlunum hellt í sigti, látið renna vel af þeim. Núðlunum hellt yfir allt í pönnunni, spínat sett á pönnuna líka og hrært í smástund, liðlega mínútu.
Uppskriftin er komin frá Nönnu Rögnvaldardóttur en aðlöguð að eigin sérviskum, eins og fleiri uppskriftir.
Borið fram með brauði og þakkað:
Þurfamaður ert þú mín sál,
þiggur af Drottni sérhvert mál.
Fæðu þína og fóstrið allt,
fyrir það honum þakka skalt.
